GDPR Cookie Consent by Free Privacy Policy Stammtisch Ruamzuzla

Am Samsdog, den 25.04.15, wird unsa Computer-Scheni (hochdeutsch: Computer-Genie), da Haydn Miche, stolze 26 Joah. Vai wern se frong, wias der Bua gschafft hod, dass a so oid wird. So gibt oan da Miche manchmoi des Gfai, als kannt a ned bis af drei zain oder goa an Spotzn vo an Elefanten unterscheiden. Owa lossts engs gsogt sa, der Bua hod mehr Grips im Kopf wia a Spotz Fleisch af da Kniascheim. Guad, schlechter Vergleich, weil ja a Spotz a ned unbedingt vai Fleisch… - egal iatzt, weg vo dem bledn Spotzn - wos ma damit song mechtn, da Miche hods einfach draf. Er lebt so noch dem Motto „Understatement“, so quasi „denkts eng vo mir wos megts, wenn i mecht, dann moch i fünf Mausklicks und kaf ma enga Lem…“, und warum denkt a se des??? Genau, weil as ka!

Owa iatz moi weg vo de Vorschusslorbeeren, heidzudogs zaid nämlich ned, wos ma moi guads gmocht hod, heidzudogs muas ma in da Gegenwart brillieren. Unsa hochdekorierter Schatzmeister (englisch: Head of Reports and Management Accounting) gibt se owa bestimmt a zu sein nächsten Ehrendog kui Blöße und lond af de oan oder andre hoiwe Bier ei. Wei des oane is gwiss, so Worte wia Freindschaft oder gmiadlichs Zamsitzen wird beim Miche mindestens in Schriftgress 72 gschriem.

Dass sei Geburtstag genau inmitten vo an Doppelspieltag der Lusenkicker liegt, is zwar ned ganz optimal, owa da Miche is kreativer wia da van Gogh zu seine besten Zeiten und losst se bestimmt an Masterplan eifoin, um dem ehrwürdigen Dog gebührend her zum wern.

Und im Endeffekt is irgendwie a scha wieder wuaschd, weils ja e wieder s´gleiche is, kam is Montag, scha is wieder ois vogessn und koa oide Sau interessiert, wos vorgestern gwen is.

Owa mir gema uns Miah, dass ma da zumindest a boa Stunden ganz noch deim Sinn und somit unvergessle mochand! Wei fia uns warst, bist und bleibst owei a zuverlässiger und superguada Kumpel, ohne den ma in vai Situationen nur hoib so vai Gaude ghod hätten.

In dem Sinn wünsch ma da mir vom Stammtisch scha moi ois erdenklich Guade, ganz vai Gsundheit und a erfolgreichs, neis Joah im zarten Alter vo 26.

P.S.: Dieser Artikel wurde aus Lust und Laune des Verfassers einfach mal wieder im sehr schönen bayerischen Dialekt geschrieben. Wer das nicht lesen kann, darf sich gerne an die Redaktion wenden, um eine Übersetzung anzufordern.